Publizitate-kanpainak

Gizarte orok lortu behar ditu honako helburu hauek: laneko segurtasuna eta osasuna lortzea, laneko arriskuen prebentzioa sustatzea eta, azken batean, pertsona guztiek ongizatea bilatzen duen ingurune osasungarri batean lan egiteko duten eskubidea baliaraztea.

Zentzu horretan, Osalanen helburu estrategikoetako bat da aurrera egitea laneko segurtasunaren eta osasunaren inguruan kontzientziatuago egongo den eta laneko arriskuak prebenitzeko orduan arduratsuagoa izango den gizarte baterantz; horretarako, funtsezkoa da agenteen artean laneko arriskuak prebenitzeko kultura sustatzea eta gizartean Osalanen balioak proiektatzea, zeinak jokabide seguruak eta lan-ingurune osasungarriak sustatzeari begirakoak baitira. Bada, beste tresna batzuen artean, erakunde honek laneko segurtasuna eta osasuna sustatzeko publizitate-kanpainak ditu lanabes.

Hori dela-eta, Osalanek urtero abiatzen ditu laneko arriskuen prebentzioari buruzko hedapen- eta sentsibilizazio-egitasmoak (horien artean, laneko arriskuak prebenitzearekin eta laneko segurtasuna eta osasuna zaintzearekin lotutakoak nabarmentzen dira), Laneko Segurtasunaren eta Osasunaren Mundu Egunaren (apirila) eta Laneko Segurtasunaren eta Osasunaren Europako Astearen (urria) harira.

Funtsean, laneko segurtasuna eta osasuna bultzatzeko irtenbideak daudela eta jarrera onak eduki daitezkeela ikusaraztea da helburua, baita agente guztiak elkarlanean aritzea ezinbestekoa dela eta enpresen eguneroko kudeaketan laneko segurtasun eta osasunaren kultura txertatzeak gizarte osoari mesede egiten diola ikusgai egitea ere.

---