UPV/EHU-Osalan Mara Isabel Bilbao Bengoechea laneko medikuntza eta erizaintzako katedra sortu da

Helburuetako bat langileen osasunaren garrantzi soziala handitzea da

Guillermo Quindós Andrések, Euskal Herriko Unibertsitateko Zientzia eta Gizarte Garapenaren eta Transferentziaren arloko errektoreordeak, eta Lourdes Iscar Reinak, Laneko Segurtasun eta Osasunerako Euskal Erakundeko zuzendari nagusiak, hitzarmen bat sinatu dute, UPV/EHU – OSALAN María Isabel Bilbao Bengoechea Laneko Medikuntza eta Erizaintzako Katedra sortzeko. Katedra horrek Medikuntza eta Erizaintza Fakultateko Prebentzio Medikuntza eta Osasun Publikoa Sailean izango du egoitza, UPV/EHUko Bizkaiko Campusean. Ekitaldian izan dira, halaber, Elena Pérez Barredo, Eusko Jaurlaritzako Lan eta Gizarte Segurantzako sailburuordea; Amaia Castaños Urcullu, Katedrako arduraduna; Joseba Pineda Ortiz, Medikuntza eta Erizaintza Fakultateko dekanoa; Koldo Callado Hernando, EHUko Zientzia eta Gizarte Garapeneko zuzendaria; Iñaki Olaizola, Osalaneko Plangintza zuzendariordea; Aitor Gisasola, lan-osasuneko arduraduna, eta María Isabel Bilbao Bengoechea, Isabel eta María Victoria Sanjuan Bilbaoren bi alabak.

UPV/EHU – OSALAN María Isabel Bilbao Bengoechea Laneko Medikuntza eta Erizaintza Katedraren helburu nagusia da lanean pertsonen osasuna prebenitzeko mekanismoak sustatzea, euskal gizartean Laneko Medikuntza eta Erizaintzaren kultura sustatzea, eta lan-osasuna prebenitzeko modu aktiboan lan egiten duten eragile guztien etengabeko prestakuntza sustatzea. Katedrak María Luisa Bilbao Bengoechea du izena. Hura izan zen lehen ikasle emakumea Euskal Herriko Medikuntza Fakultatean (1936-1937), gerra zibila eten zuen lehen fakultate iragankor horretan.

“Laneko osasunak balio sendoa izan behar du gizarte osoarentzat. Herritarrek beren lan-giroa leku seguru eta osasunaren sustatzaile gisa bizi eta senti dezaten eska dezakete. Informazio eta kontraste akademikoaren eskariak gora egiten du erronkak, aukerak, diagnostikoak eta ebazteko estrategiak partekatzen dituen mundu globalizatu honetan, eta informazio hori gure Katedraren bidez bideratuko dugu, adierazi du Guillermo Quindósek sinaduraren ondoren.

Bestalde, Lourdes Iscarrek hauxe nabarmendu du: “Laneko Medikuntza eta Erizaintzako Katedraren egiteko nagusia laneko arriskuen prebentzioaren zabalkundea, dibulgazioa, kontzientzia eta aplikazio handiagoa eta hobea sustatzea eta dinamizatzea izango da. Horretarako, prebentzio-agenteei begira egin beharko du lan: enpresak eta langileen ordezkariak, prebentzio-zerbitzuetako teknikariak eta osasun-langileak eta pertsonen osasuna zaintzen duten beste osasun-langile batzuk”.

Era berean, Katedrak kultura hori sustatu beharko du botere publikoetan, osasun-arloko desberdintasunak saihestuko dituzten politikak diseina ditzaten eta, eragile horien bidez, balio hori gizarteari igor diezaion. Katedrak, laburbilduz, botere publikoen zerbitzura egongo den organo teknikoaren funtzioa beteko du, eta, horretarako, agente estrategikoak prestatzeko, aholkularitza eta ikerketa fokaleko lanak egingo ditu.

Hortaz, Katedrak gizartean eta erakundeetan osasunaren kultura zabaltzeko eta dinamizatzeko lanak egin beharko lituzke, eta aholkularitza eta laguntza eman beharko lieke lan-arriskuen prebentzioan parte hartzen duten agenteei. Katedrak, horrela, unibertsitateko mundu akademikotik ezagutza aditua ateratzea ahalbidetuko duen konexio-eragile baten lana beteko du.

UPV/EHU – OSALAN María Isabel Bilbao Bengoechea Laneko Medikuntza eta Erizaintzako Katedra lehen mailako tresna estrategikoa izango da, laneko osasunaren arloa sustatu, zabaldu, prestatu eta ikertzeko.

Osalanen eta UPV/EHUren arteko sinatutako hitzarmena (pdf 10MB)