Agente instituzionalek eta sektorialek Euskadiko elikagaien eta zuraren balio-kate osoan prebentzio-kultura eta zero ikuspegia ezartzeko konpromisoak sinatu dituzte

• Zazpi eragile instituzional eta sektorialek parte hartu dute Euskadin zuraren sektorean prebentzio-kultura sustatzeko sinaduran.

• Ekitaldia “Basogintzako istripu larri eta hilgarriak prebenitzeko 2022-2024 jarduketa-ildoak” aurkezteko aurrez aurreko jardunaldiaren esparruan egin da.

2019-2025eko Euskadiko Elikaduraren eta Zuraren Balio Katerako Laneko Segurtasun eta Osasunerako Estrategia Sektorialaren esparruan, Euskadipreben, eta basogintzan istripuen prebentzioa bultzatzeko helburuarekin, Bizkaiko, Arabako eta Gipuzkoako Foru Aldundiek, Lanbidek, Hazik, Neikerrek eta Baskegurrek konpromiso batzuk sinatu dituzte Euskadiko elikaduraren eta zuraren balio-kate osoan prebentzio-kultura eta”zero”ikuspegia ezartzeko: zero istripu hilgarri sektorean, eta istripu eta gaixotasun profesionalen % 15 murriztea prebentzio-neurriak aplikatuz, bizitza- eta lan-baldintzak hobetuz eta arriskuen gobernantza egokia sustatuz.

Sinadura urriaren 10ean egin da Arkauteko Neiker instalazioetan, eta OSALANek eta Eusko Jaurlaritzako Ekonomiaren Garapen eta Azpiegitura Saileko Nekazaritza, Arrantza eta Elikadura Politikaren Sailak elkarrekin egindako ekimena da. Halaber, euskal erakundeek lan-ingurune seguruak, osasungarriak eta iraunkorrak lortzeko konpromiso sendoa dutela erakusten du, Euskadiko lehen sektorearen eta haren balio-katearen erreferente eta ezaugarri gisa.

“Tamalez, azken bolada honetan istripu hilgarriak gertatu direla ikusi dugu, eta horiekin batera, baso-sektoreko familian pertsonen sufrimendua. Sektoreen eta erakundeen arteko esparru bateratuan garatutako jarduera-ildoen apustu horren helburua da ezohiko egoera hori iraultzea eta sektoreak kalitatezko lana eta produktuak eskainiz gozatzea”, Elena Pérez Barrredo Lan eta Gizarte Segurantzako sailburuordearen arabera.


Bittor Oroz Izagirre Nekazaritzako, Arrantzako eta Elikagai Politikako sailburuordearen hitzetan, “ezinbestekoa da ikuspegi holistikotik eta modu bateratuan jarduerak egitea, sektore-esparruan sentsibilitatez eta multzo-kontzientziaz jokatzeko gai izan gaitezen guztion artean, baina baita gizarte gisa ere, oro har, irizpidea izan behar baitu eta guztiontzako osasun-kultura duen sektore baten aldeko apustua arautu behar baitu”.


2022-2024 bitarteko Basogintzako istripu larri eta hilgarrien prebentziorako jarduketa-ildoak

Ekitaldia “2022-2024 bitarteko Basogintzako istripu larri eta hilgarrien prebentziorako jarduketa-ildoak” aurkezteko aurrez aurreko jardunaldiaren barruan egin da, eta bertan izan dira OSALANeko zuzendari nagusi Lourdes Íscar, hiru foru-aldundietako, Baskegurreko eta Hazi Fundazioko ordezkariak eta erakunde sinatzaileen ordezkariak.

Lourdes Iscarrek bere hitzaldian adierazi duenez, kontuan izan behar da lehen sektoreko jarduera baldintza zailetan egiten dela askotan, lanak ahalegin fisiko handia eskatzen duela edo ingurumen-baldintza gogorretan egiten dela, batzuetan eremu isolatuetan eta, bereziki, basogintzan. Horregatik, sektore hori Laneko Segurtasun eta Osasunaren Euskal Estrategiak jasotzen dituen lehentasunezko lan-ildoen artean dago.