Arriskuen kudeaketa eta lan-baldintzen hobekuntza

Arlo honetan laneko arriskuen prebentziorako funtsezkoak diren tresnen hobekuntza bultzatu nahi da, hala nola arriskuen ebaluazioa, prebentzio-ekintzen plangintza, eta langileen osasunaren zaintza.

Prebentzio-zerbitzu eta enpresen jardueren kalitate-mailak izango dira ekintza nagusien ardatz, bai ekintza teknikoei bai sanitarioei dagokienez, kalitate hori areagotzea ahalbidetuko duten laguntza-tresnak sortu eta zabalduaz eta, ondorioz, langileriaren arriskuekiko esposizioa gutxituaz.

Horregatik aurrekontuko diru-izendapenak ezartzen dira tresna metodologikoak egin eta zabaltzeko, hala nola gida teknikoak, protokoloak, ikerketa-proiektuak eta arlo honetako azterlanak.

Arriskua gutxitzera bideratutako bigarren lan-ildo bat lan-baldintzen hobekuntza bultzatzea da, baldintza horietan eragiten duten faktoreetan jardunaz, hala nola lan-tresnak, eragile kimiko eta biologikoak, diseinu ergonomikoa, antolakuntzaren baldintzak eta arrisku-faktore psikosozialak.

Jarduera garrantzitsuenek ildo horretan lan-tresnak berritzea sustatuko dute diru-laguntzen bidez, eta lan-baldintzen hobekuntza azterlan eta ikerketa-proiektuen bidez bultzatuko dute, bai eta langileen osasuna eta enpresen lehiakortasuna hobetuko duten lan-metodologiak ezarriaz ere.

Prebentzioa enpresen kudeaketan txertatzea

Ekintzen jomuga laneko arriskuen prebentzioa kudeaketan txertatzea da, batez ere ETEetan eta mikroETEetan, prebentzioa enpresek beren baliabide propioekin beren gain hartzea indartuaz.

Ekintzek arriskugarritasun bereziko, arrisku-maila altuko eta prebentzio-arazo handieneko sektore, jarduera eta enpresak izango dituzte ardatz, hala nola lehen sektorea, eta horretarako azterlan eta ikerketa-proiektuak, eragile publiko eta pribatuekiko hitzarmenak eta prebentzioaren kudeaketa erraztuko duten metodologia eta tresnen garapena erabiliko dira.

Lana pertsonari egokitzea

Lan-baldintzei eta laneko arriskuen prebentzioari dagokienez ezaugarri espezifikoak dituzten taldeen laneko arriskuen prebentzio-arloko beharrei erantzutea da arlo honetan helburu nagusia; horiek dira adineko langileak, esperientzia gabeko gazteak, emakumeak, langile migratzaileak, eta desgaitasunak edo osatzen ez diren gaixotasunak dituzten pertsonak.

Aurrekontuetan sartu beharreko ekintzak, batez ere, azterlan eta ikerketa-proiektuak izango dira, eragile publiko eta pribatuekin lankidetzan, bai eta lanpostuak egokitzeko beharrak identifikatzea eta neurriak ezartzea bideratuko duten metodologia eta tresnak garatzea ere.