Jardunaldian, belauneko lesioen abordatzea aztertu da. Artikulazio hori bereziki ahula da lan-ingurunean, mugikortasuna, karga edo desplazamendua eskatzen duten zereginetan inplikatuta dagoelako. Duten garrantzia gorabehera, patologia horiek oharkabean pasatzen dira, nahiz eta askotan laneko bajak, gaixoberritzeak eta lanpostuaren egokitzapenak eragiten dituzten.
Osalaneko Laneko Medikuntzako mediku espezialista Asun Muruagak ongietorria egin ondoren, Tubos Reunidos Group-eko Laneko Medikuntzako mediku espezialista César Rattia doktoreak bloke teknikoa ireki du "Beharrezkoa al da belauna miatzea azterketa medikoetan?" izeneko hitzaldiarekin. Bertan, artikulazio hori aldizkako ebaluazioetan sartzearen garrantzia aztertu du, disfuntzioak garaiz detektatzeko.
Ondoren, Pablo Barceló Laneko Medikuntzako mediku espezialistak "Teknika ekografikoaren ekarpena gure zerbitzuetan" aurkeztu du. Bertan, ekografiak lan-osasunaren eremuan tresna diagnostiko irisgarri eta eraginkor gisa duen balioa azaldu du.
Etenaldi baten ondoren, David García doktoreak, Basurtuko Unibertsitate Ospitaleko traumatologoak, "Ebakuntza kirurgikoen eta patologia kronikoen osteko gomendioak" hitzaldia eskaini du. Bertan, lanera segurtasunez eta eraginkortasunez itzultzeko irizpide klinikoak jorratu ditu, bereziki artrosia, kondromalazia eta belauneko beste gaixotasun kroniko batzuen kasuetan.
Jardunaldiari amaiera emateko, solasaldi bat izan da, eta bertaratutakoek zalantzak planteatu eta esperientziak partekatu ahal izan dituzte, profesionalen artean ezagutzak trukatzen lagunduz.